سكرتيره ولكن

الفصــل العشـــــــــرون ” الآخيــر ”

الايام كانت بتمر علينا عاديه علينا في الشغل مفيش اي جديد .. بس للاسف الشركة بدأت تخسر عملا كتير جدا ومش عارفين ايه السبب .. كل ما ندخل في صفقه لازم نخسـ,ـرها .. وكل ما ربنا يكرمنا بشغل جديد لازم نخسره .. بدأت ادور واشوف ايه السبب في كده بس للاسف مالقيتش سبب .. سيف حاول يدور ويسأل ناس قريبه من الشركات اللي بنتعامل معاها .. للاسف لقي خالد هو السبب في ده
دخلت لسيف لاقيته عصبي جدا وبيقولي شوفتي يا نادين شوفتي خالد هو اللي بيخسرني شغلي
قولتله حسبي الله ونعم الوكيل فيه
قالي بعد ما كبرته وعلمته الشغل وكان جايلي مش عارف اي حاجة وقفت جمبه وكبرته وفي الاخر يعض الايد اللي اتمدتله
كنت بجد متضايقه وحسيت ان انا السبب في اللي بيحصل ده
قولتله انا السبب في كل ده
قالي وانتي ذنبك ايه انا لازم اوقف الحيوان ده عند حده
قولتله اشتغل واعمل اللي عليك وبلاش العصبيه علشان صحتك يا سيف قصدي يا استاذ سيف
اول مرة اغلط ومقولهوش استاذ سيف اول مرة انادي عليه باسمة من غير القاب بس كنت حاساها اوي خلاص مابقاش ينفع اقوله استاذ حسيت انه روحي واقرب حد ليا في دنيتي ازاي انادي عليه بلقب يحط بينا حد
لاقيته بيبصلي وبيقولي حلوة سيف منك لما نبقي لوحدنا قوليلي سيف
بصتله بسعاده وحب وقولتله ميصحش
قالي لاء يصح ونص ياسيتي انا اللي بطلب منك
فعلا علاقتي بسيف بقت قريبه اوي من بعض .. كانت الايام بتمر والشركة كل يوم بتخسر الافات وبنخسر عقود وبنضطر ندفع شروط جزائيه .. منه لله اللي كان السبب
سيف نفسيته تعبت اوي وبقي دايما حزين ومتوتر .. الشركة مبقتش بتشتغل زي الاول تقريبا مابقاش فيه شغل والسيوله بدأت تخلص .. سيف اول مرة اشوفه حزين وكئيب كده حسيت ان كل احلامه بتنهار قدامة ومش عارف يعمل ايه .. فضلت اشتغل واعمل المستحيل علشان الشركة ترجع تاني بس للاسف الشركة كانت بتخسر وبتنهار
وفي يوم كنت قاعده علي المكتب مش عارفه اعمل حاجة لسيف .. كنت حزينه لحزنه اوي كنت بمو…ت من جوايا وانا شايفاه كده ومش قادرة اعمل حاجة
لاقيت سيف بينادي عليا .. دخلتله ووقفت قدامة وقولتله تحت امرك يا استاذ سيف
لاقيته بيديني فلوس وبيقولي ده مرتبك طول الشهر ده وللاسف انا مضطر استغني عنك ومضطر استغني عن كل الموظفين
قولتله لاء مش هتتقفل يا سيف مش هتتقفل
قالي مش هينفع يا نادين خلاص كل حاجة راحت
قولتله هنبدأ من جديد مش هنستسلم وننفذ كل اللي هو عايزه هتقف من تاني
قالي خلاص انا مبقتش قادر محدش راضي يتعامل معانا وانا متعودش ابقي تحت رحمة حد
قولتله الفلوس دي انا مش عايزاها ولو كل الناس مشيت من هنا انا مش همشي
قالي هتبقي لوحدك صدقيني يا نادين خلاص انا نفسي همشي ومبقتش عايز حاجة
قولتله اوعي تيأس طول ما انا معاك اوعي
قالي شوفي حياتك يا نادين انتي خدتي خبره حلوة اوي وممكن تشتغلي في اي مكان لاقيته بيمدلي ايده بورقه فيها شهاده خبره
مسكت الورقه وقطعتها وقولتله ولا الف شهاده هتخليني اسيب الشركة دي انا حلمي وحياتي هنا ومش هسيبه مهما حصل
قالي بعصبيه وانا مش عايزك يا نادين مش عايزك
بكيت اوي بكيت ان خلاص حلمي ضاع وسيف مابقاش معايا قولتله حتي لو انت مش عايزني انا مش هسيبك مش هسيبك ابدا
سيبته ومشيت وقعدت ادعي ربنا ان الشركة تقف من تاني علي رجليها بس للاسف كل يوم كان بيمر كنا بنخسر .. واضطر سيف انه يقفل الشركة وانا قعدت في البيت من تاني
رجعت لوحدي بس المرة دي راجعه بقلب مكسور متحطم قلب خلاص مالوش مكان في الدنيا .. قلب داق الحب واتعذب منه ومن طعم الفراق .. قلب انهار من كل حاجة حصلتله .. قلب حلم واتمني وللاسف مفيش حاجة من حلمة اتحققت .. سيف بقي بعيد عني ومش من حقي اهتم بيه .. تعبت اوي وانا بعيد عنه .. خدت علي قربي منه خدت علي انه دايما كان سبب فرحي .. مكنش بيعدي يوم من غير ما ابكي عليه .. نفسيتي تعبت ومبقتش قادرة اعمل اي حاجة في حياتي .. انا كمان اليأس اتملك مني ومبقتش عايزة حاجة من الدنيا .. هعوز ايه بعد ما حلمي ضاع مني وسيف كمان ضاع مني .. كنت بكلمة تقريبا كل يوم اسمع صوته بس واقفل وعلشان ميعرفش مين جبت رقم تاني وكنت بتصل بيه منه .. بس تعبت من الاشتياق ليه .. نفسيتي ادمرت وبقيت واحدة تانيه واحدة يائسه كارهه الحياه .. حياه فاضيه وقلب مكسور .. مكنتش باكل ولا كنت بشرب .. وكانت دموعي دايما ساكنه عنيا .. ماما في مرة سالتني وقالتلي كل ده علشان سيبتي الشغل ما راح شغل يجي الف وانتي مش محتاجة الشغل .. كنت محتاجة افضفض مع حد بجد محتاجة حد يشجعني اعمل حاجة .. دخلت ع النت وكلمت اسما صديقتي اللي مسبتنيش لحظة واحدة وكانت دايما رفيقتي وكانت دايما بتشجعني ع اني اقوي واقف من تاني .. بس المرة دي لما اتكلمت معاها مكنتش قادرة بجد اسمع حد ولا اسمع نصايح .. مش عايزة حد يقولي انسي .. قعدت بالمنظر ده شهرين .. شهرين عدو عليا كانهم سنتين او عشرين سنه .. حسيت اني كبرت فوق عمري عمرين .. خسيت ونزل وزني جامد .. كانت حاجة حلوة ليا .. بس عيني بقت تحتها اسود من التعب والارهاق وشي كبر ومبقتش بهتم بنفسي ولا بهتم بحياتي .. هي كده هتتعاش هتتعاش .. بس انا كنت رافضه حتي الحياه فيها
قربت من ربنا وخليته يقويني .. ربنا وقف جمبي وساعدني اني اقف علي رجلي من تاني
في يوم كنت قاعده ع الكمبيوتر وبتصفح كنت بعمل اي حاجة تلهيني عن التفكير .. وبما اني خبيره نت مكنتش بغلب قدام اي حاجة اهو اي حاجة اتصفحها وخلاص .. وبقلب بين المواقع ولاقيت شركة عامله اعلان بدأت اقلبها في دماغي .. وقولت ليه لاء اعمل اعلان للشركة .. وفعلا عملت الاعلان وعملت عرض كبير اوي للشركة مهمنيش التكاليف اللي اتكلفتها بس كان لازم اعمل حاجة لسيف .. لازم اساعده حتي وانا بعيد عنه
بدأت ابعت من ايميل الشركة عروض للشركات وكنت حاطه رقم سيف علشان يبدأ يهتم بشغله وبحياته من جديد .. فعلا شركات كتير استجابت للتعامل معانا وطبعا انا كنت من الباطن محدش يعرف مين اللي بيعمل كده .. بجد انا اتعلمت حاجات كتير من سيف وكان لازم استغل اللي اتعلمته علشان انقذه من اللي هو فيه
فعلا الشركة بدأت ترجعلها الروح من جديد .. وكنت براقب سيف علشان بس اطمن عليه حتي لو من بعيد لبعيد
بس برضه كان شكله حزين بالرغم من ان الشركة رجعت تاني صحيح مرجعتش زي الاول بس ع الاقل انه بدأ الطريق وهو يكمله زي ما كمله قبل كده
انا كنت دايما براقب سيف وبشوفه من بعيد لبعيد بشوفه وهو نازل من بيته وبشوفه وهو نازل من شركته .. كنت كل ما اشوفه عيني تدمع مني غصب عني .. بجد كان واحشني اوي مكنتش قادرة ابعد عنه اكتر من كده .. بس بالرغم من كده مكنتش قادرة لا اقرب منه ولا ابعد عنه .. سيف اتخلي عني وانا بحبه مع اني عمري ما اتخليت عنه وكنت دايما واقفه جمبه .. قررت ابعد عن سيف وعن البلد كلها .. كان لازم الم جرحي باي شكل .. انا كده عملت اللي عليا مع سيف ورجعتله شركته تاني زي ما كنت انا السبب في سقوطها انا برضه السبب في رجوعها زي ما كانت .. حتي داليا علاقتي بها اتقطعت من ساعه ما عرفت انها اتجوزت هي ومصطفي .. خلاص بقيت لوحدي ومفيش حد معايا .. عملت كل حاجة علشان افرح الناس وللاسف طول عمري هفضل حزينه وقلبي مكسور
قررت اسافر اروح عند عمتي في القاهره اقعد هناك شويه بعد الحاح كبير من بابا لانه لقي نفسيتي تعبانه .. فعلا سافرت بس كنت بقعد دايما لوحدي كنت بقعد افتكر سيف وافتكر كل ذكري حلوة بينا .. كان واحشني اوي كانت تفاصيله واحشاني .. يومي في الشركة واحشني .. لما بيقولي كلمه حلوة ولا لما بيبقي عصبي واخفي عنه عصبيته واشيل عنه همه .. بدأت افكر فيه لاقيت نفسي غصب عني بتصل بيه .. سمعت صوته تعبان ومضايق كان نفسي اقوله مالك يا سيف بس مقدرتش دموعي نزلت مني غصب عني .. مبقتش قادرة استحمل شلت الخط ورميته من الشباك .. كنت عايزه اقطع كل حاجة توصلني بيه .. بس ازاي اقطع كل حاجة وهو بيجري في دمي
تعبت من قعدتي عند عمتي ورجعت بيتي .. ولما رجعت لاقيت بابا بيقولي واحدة اسمها داليا جاتلك وسالت عليكي
قولتله باستغراب داليا
قالي اه اللي كانت معاكي في الشركة
قولتله مقالتلكش عايزة ايه
قالتلي لاء مقالتش بس قالت هتعدي عليكي تاني وسابت رقم تليفونها علشان تكلميها لان تليفونك علي طول مقفول
قولتله ماشي يا بابا
بصراحة اول حاجة فكرت فيها ان سيف جراله حاجة .. بس رجعت لحياتي عادي .. وحده وفراغ والم وحزن واشتياق الف احساس ملخبط ممزوج بالالم بس علشان سيف
في يوم كنت قاعده لاقيت بابا بيقولي اطلعي كلمي
قولتله مين يا بابا
قالي داليا ومعاها واحدة تانيه
لبست اسدالي وطلعت اتفاجأت لاقيت قدامي داليا وضحي
خدوني بالحضن وقالولي حرام عليكي دوختينا عليكي
داليا قالتلي ايه اللي عمل فيكي كده يا نادين يا حبيبتي ده انتي خاسه خالص
سلمت عليهم وقعدت معاهم شويه لاقيت ضحي بتقولي لو سمحتي قومي البسي وتعالي معايا حالا
قولتلها فين
قالتلي سيف محتاجك اوي يا نادين اوي ارجوكي يا نادين علشان خاطري سيف تعبان اوي ومش بيجيب سيره غير سيرتك وبس دور عليكي كتير اوي
اول ما قالتلي كده حسيت ان قلبي وجعني اوي يعني انا سبب تعبك يا سيف انا عمري فداك يا سيف ولا اني اشوفك تعبان ابدا
لاقيت داليا بتقولي يلا بسرعه
دخلت لبست واستأذنت من بابا وروحت معاهم بيت سيف
دخلت البيت لاقيته نايم ع السرير قربت منه وانا دموعي ماليه عنيا اول ما شافني قام من مكانه قولتله ارتاح يا سيف
قالي انا لما شوفتك ارتحت ارتحت اوي يا نادين قالي كده تدوخيني عليكي كل المده دي تعملي كل ده علشان الشركة وتسيبيها يا نادين ترجعيها تاني للحياه وتسافري ليه
قولتله انت عرفت منين
قالي مفيش حد بيخاف عليا ولا بيحبني قدك يا نادين انا دوخت عليكي علشان اعرف طريقك كان غصب عني بعدي عنك كنت بمو…ت في اليوم الف مرة وانتي بعيد عني قوليلي ازاي اعيش من غيرك يا اقرب انسانه ليا ازاي .. ازاي ابعد وانتي الهوا اللي بتنفسه .. ازاي قدرتي تبعدي عني يا نادين ازاي
قولتله بدموعي كنت بمو….ت من غيرك والله ماكنت قادرة استحمل غيابك عليا بس انت سيبتني واتخليت عني .. كنت براقبك وبشوفك واعرف اخبارك من بعيد لبعيد
قالي كنت بسمع صوتك ونفسك لما بتكلميني واخر مرة كنت هقولك وحشتيني يا نادين بس لاقيت الخط اتقفل واتصلت ع الرقم كتير بس لاقيته مقفول .. دوخت عليكي يا نادين علشان اقولك اني بحبك .. بحبك من زمان اوي يا نادين من ساعه ما غيرتيلي حياتي بطيبتك وحنيتك .. قلبك الكبير اللي كان دايما بيقومني ويساعدني .. باهتمامك بيا وخوفك عليا .. حبيت نادين من جواها حبيت قلبها
قولتله يعني مكنش همك اني مليانه
قالي مكنش يهمني اي حاجة في الدنيا غير نادين نادين وبس ومش عايز من الدنيا غيرك تتجوزيني يا نادين
مكنتش قادرة استحمل اي حاجة سيبته وجريت روحت البيت ورميت نفسي ع السرير كنت حاسه اني بحلم لاقيت داليا بتكلميني وبتقولي ايه يا مجنونه سيبتيه ليه
مكنتش عارفه ارد عليها ولا اتكلم مكنتش قادرة حتي انطق من فرحتي وكسوفي كنت فرحانه اوي
تاني يوم قومت من النوم وانا كلي امل في الحياه لبست وروحت لسيف الشركة ودخلت مكتبه وقولتله لو سمحت انا جايه علشان وظيفه السكرتيره
لاقيته بصلي وقالي انتي مش هتبقي سكرتيره وبس انتي هتبقي كل حياتي