كيس إندومي
كيس إندومي
لما أهلي سألوني: “إنتي اتطلقتي ليه بعد 3 شهور بس من جوازك؟” كان ده ردي…
بسبب كيس إندومي.
ده كان اليوم اللي طلبت من جوزي يجيبلي كيس إندومي وهو راجع بالليل، عشان كنت جعانة، والأكل كله كان تحت عند حماتي وهي قافلة عليه، ومفيش أي حاجة في شقتي أعملها تسد جوعي. اتكسفت أنزل أقولها إني جعانة.
جوزي كان متعود يرجع من شغله متأخر، فاتصلت بيه وقلتله يجيبلي معاه كيس إندومي أعمله في شقتي بشوية مية مغلية وآكله.
أول ما رجع، كانت حماتي لسه صاحية، ونادت عليه قبل ما يطلع الشقة عندي.
شافت في إيده كيس أسود صغير، وقالت بسخرية: جايب إيه في إيدك يا حبيب أمك؟
قالها: دي منار جعانة يا أمي، وجبتلها معايا كيس إندومي تاكله.
قامت وهي بتزعق بأعلى صوتها: جعانة إيه! هي البت دي مبتشبعش أبدًا؟! وتخليك تجيبلها حاجة وإنت جاي ليه؟ هو أنا كنت حرماها من حاجة؟
حاول يهديها وقال: معلش يا أمي، وبعدين ده كيس إندومي بعشرة جنيه، مش مستاهل يعني.
وقفت أمه قصاده بعصبية وقالت: وهي العشرة جنيه قليلة؟!
وبعدين وقفت تنادي عليا بأعلى صوتها: إنتِ يا ست الستات اللي فوق… انزليلي هنا.
نزلت بسرعة وأنا مرعوبة من صوتها العالي.
حطت إيديها في وسطها وقالت: لو فاكرة إنك هتعيشي هنا على مزاجك تبقي غلطانة. البيت ده ليه أصول وقواعد، واللي عايز ياكل يقول، مش يبعت ابني يشتريله أكل مخصوص!
نزلت راسي وقلت بهدوء: والله يا طنط أنا ما كنتش عايزة أضايق حضرتك، بس كنت جعانة واتكسفت أنزل.
ضحكت بسخرية وقالت: اتكسفتي تنزلي تاكلي من البيت، وما اتكسفتيش تكلفي ابني مصاريف زيادة؟
بصيت لجوزي مستنية منه كلمة تدافع عني، لكنه كان واقف ساكت، لا بيتكلم ولا حتى بيبصلي.
وقتها حسيت إن الإهانة وجعتني أكتر من الجوع نفسه.
طلعت شقتي وأنا حابسة دموعي، وبعد شوية لقيته داخل.
قلتله: إنت ساكت ليه؟ مش شايف أمك بتكلمني إزاي؟
رد ببرود: معلش يا منار، إنتِ عارفة طبع أمي.
يعني أسكت على الإهانة؟
عديها وخلاص.
من يومها بدأت أفهم إن حياتي في بيت العيلة مش هتبقى سهلة.
كل حاجة كانت لازم تعدي على حماتي.
الأكل… بإيدها.
المصاريف… بإيدها.
حتى الغسيل كانت بتفتش فيه وتعلق على هدومي.
لو اشتريت حاجة لنفسي تقول: فلوس ابني بتتصرف على الفاضي.
ولو خرجت مع جوزي ساعة تقول: من يوم ما اتجوزها وهو اتغير.
