قصه كريم
أما الضابط فكمل وهو رافع الملف
معايا أمر بالقبض على حضرتك… لكن سبب القبض ملوش أي علاقة باللي حصل النهارده… السبب أخطر بكتير، ولما كريم عرف التهمة، حس إن كل اللي اكتشفه لحد دلوقتي كان مجرد بداية لكارثة أكبر بكتير.
الكل سكت في لحظة، حتى صوت المطر بقى كأنه اختفى. حسن الدمنهوري بص للضابط وهو بيحاول يحافظ على هدوءه وقال
أكيد في غلطة.
الضابط فتح الملف وقال
مفيش أي غلطة. معانا بلاغات ومستندات وتحقيقات بقالها شهور، والنيابة أصدرت أمر بضبط حضرتك.
نادية جريت ناحيته وهي بتصرخ
إنتوا عارفين بتكلموا مين؟!
لكن الضابط مردش عليها، وإدى إشارة للعساكر يقربوا.
كريم كان واقف مش قادر يستوعب اللي بيحصل. من ساعة واحدة كان داخل على فرحه، ودلوقتي عرف إن عنده بنت، واكتشف إن أمه وأبوه خبوا عنه الحقيقة، والشرطة جاية تقبض على أبوه.
بص لأبوه وقال
قول لي الحقيقة… إيه اللي مخبيه تاني؟
حسن سكت شوية، وبعدين ضحك ضحكة كلها يأس.
قال
واضح إن كل حاجة هتتكشف النهارده.
نادية مسكت دراعه بعصبية.
إوعى تتكلم.
بصلها حسن وقال
كفاية… تعبنا من الكدب.
لف ناحية كريم وقال
أنا فعلاً فرقت بينك وبين دنيا، وخبيت عنك بنتك… لكن ده مكانش أكبر ذنب عملته.
كريم حس بقلبه بيدق بعنف.
قال
تقصد إيه؟
حسن بص لدنيا وقال
احكي له… يمكن يصدق منك أكتر.
دنيا دموعها نزلت وهي بتحاول تتمالك نفسها.
قالت
فاكر يوم ما اختفيت؟
هز كريم راسه.
قالت
أنا مختفيتش… أنا اتخطفت.
شهق كل اللي واقفين.
كملت وهي صوتها بيرتعش
رجالة تبع والدك أخدوني من قدام البيت، واحتجزوني أيام كاملة. خدوا مني موبايلي وكل أوراقي، وقالولي لو حاولت أوصلك أو أقولك إني حامل… هتندم طول عمري.
كريم حس إن رجليه مش شايلاه.
بص لأبوه وهو بيصرخ
الكلام ده حقيقي؟
حسن نزل عينه في الأرض.
وده كان كفاية.
كريم فهم إن أبوه بيعترف من غير ما يتكلم.
ليلى كانت ماسكة إيد أمها بقوة، ومش فاهمة ليه الكبار بيعيطوا.
بصت لكريم وقالت بصوت بريء
إنت زعلان ليه يا بابا؟
الكلمة دي كسرت قلبه.
نزل على ركبته قدامها وضمها لأول مرة في حياته.
فضل يبكي وهو حاضنها، كأنه بيعوض سنين كاملة ضاعت منه.
ليلى حطت إيديها الصغيرة على وشه وقالت
متعيطش… أنا لقيتك خلاص.
حتى الضابط والعساكر اتأثروا بالمشهد.
لكن فجأة طلع صوت واحد من رجال الأمن وهو بيجري ناحية حسن.
