لست أثمه
حازم: لاء الحمد الله اخدتها على المستشفى وهيا قبل مايغمى عليها قالت للناس اللى كانوا حواليا انها هيا اللى غلطانه
نجوى: الحمد لله يابنى ربنا يبعد عنك ولاد الحرام يارب
حازم: كله بفضل دعاكى ياست الحبايب
نهى: وانا والله بدعيلك على طول يا حازم
حازم مازحاً: طبعا مش انا اللى جايبلك حبيب القلب
نهى : الله يا حازم بقى
حازم: طيب لما هوا كده لازمته ايه خناق كل شويه مش تعقلى بقى
نهى: يا سلام انا اللى اعقل
حازم: حسن صاحبى من زمان وانا عارفه انتى اللى تجنى بلد
نهى: انا؟ كده برضه؟ ايش حال انا اختك وهوا يا دوب صاحبك
حازم: ههههه بقولك ايه انتى هتأخرينى انا لازم اروح المستشفى
نجوى: معقول يابنى دا انت لسه راجع الفجر مالحقتش ترتاح
حازم: معلش يا امى واهو عشان برضه اطمن على اللى اتخبطت دى
نجوى: ربنا يديك الصحه يابنى ويقويك طيب استنى لما فطر
حازم: لاء انا هفطر فى المستشفى وكمان عشان الحق محامى المستشفى اقوله على اللى حصلى عشان لو فيه اجراءات قانونيه
نجوى: طيب خد بالك من سكتك وسوق على مهلك
وان شاء الله ربنا يجيب العواقب سليمه يابنى
حازم: مع السلامه يا امى مع السلامه يا نونا وخدى بالك من ماما ومن مذاكرتك
نهى: علم وينفذ
يتجه حازم الى عمله وهو يفكر باحداث الامس القريب ويفكر فى سيرين
يصل الى المستشفى ويتجه فورا الى غرفتها للاطمئنان عليها من جديد يطرق باب الغرفه
سيرين: ادخل
حازم: صباح الخير
سيرين : صباح النور
حازم: هاه عامله ايه دلوقتى
سيرين: الحمد لله احسن
حازم: لسه فى الم صح؟
سيرين: شويه
يرفع حازم الغطاء قليلا
تنهره سيرين بشده: انت هتعمل ايه ؟؟؟؟؟!!!!!
حازم يبتسم لها مطمئنا اياها: ماتخفيش انا هكشف عليكى
سيرين تشد الغطاء بقوه: متشكره انا مش عايزه حد يكشف عليا انا عايزه اخرج من هنا
يغضب حازم من اسلوبها الجاف وطريقتها المتعجرفه ليجيب فى برود: مافيش خروج ليكى قبل على الاقل 24 ساعه كمان فى اجراءات لازم تتخذ
سيرين: قصدك حساب المستشفى؟اللى انتو عاوزينه خدوه على داير مليم
حازم بحده: انا مجبتش سيره الفلوس لكن ماتنسيش انك جيتى بسبب حادثه والمفروض كان يتعمل محضر فى القسم
سيرين: منغير محضر ولا حاجه حضرتك خبطتنى بعربيتك وانا مش عاوزه تعويض
حازم: وانتى فاكره انى هديكى تعويض انتى اللى رميتى نفسك على العربيه عشان تخلصى من اللى فى بطنك
